GOLDEN CHOIR:
Keithelmanbi Baptist Church in April 17, 1999 kumin Houbung kiphudoh kal kum 50 lhinna Golden Jubilee kipahtah le hanomtah in, Hatchungnung Pathen, Tonsot Songpi thangvahna pe pumin kipah tah in ana kimangin ahi. Mipi suhal ding leh lasah khomna a mipui dingin Choir khat ana kiphut doh in ahi. Chuleh, Houbungin Golden Jubilee het jingna dingin hiche kum (1999) ma Christmas chu Golden Christmas ti in ana kimangin ahi. Hitichun, kum le lha ahung kiheijin vannoi jin ana ngalel kum 2000 chu gim gentheina le tijatna umlouvin ahung lhung tan ahi.
Golden Jubilee hetjingna dingin Houbung in Choir ana kiphutdoh in, hichu, Golden Choir tin ana kiminvo tai. Pathen phatsah ahi a kum 75 lhinna Platinum Jubilee Houbungin ahin kiman jeng tah leh hiche Choir jong hi Platinum Choir ti a amin khelding lunggel a umin ahi. Pathen thupha mihemte lah a seiphong le lhangsap a aumna dingin Golden Choir lin nikho 24th August 2000 nin DDK, Imphal la amasapen na dingin Pathen vahchoila ho an khumin, hiche nikho chu Golden Choir kiphudohna nikho tin ana kimang pan tan ahi. Hitichun Golden Choir lin aban banning Pathen vahchoila ho DDK, Guwahati a aga khumin, chule, 107th Assembly cum Centenary celebration of Baptist Churches of Mizoram (BCM), Ao Baptist Church-Kohima, KBA Church-Kohima, Kuki Worship Service-Shillong (KWS-S), Mao Baptist Church, Tadubi Baptist Church, Town Church-Tamenglong, Rongmei Baptist Church , Liangmei Baptist Church ho in jong ana kalsong uve. Golden Choir lin Keithelmanbi Military Colony leh kho kimvella Houbungho amin na sei dingin Kangpokpi Centre Church (KBC), Haipi Baptist Church (TBA), Tumnokpokpi Baptist Church (TNBA), Motbung Baptist Church (TBA), Centre Church-Sapormaina (KBC), Kangpokpi Christian Church (KCC), Keithelmanbi Solam Baptist Church (KBC), BBC-Keithelmanbi chule adang dang ho jong ana chon nin ahi.
Houbung vilna le Radio, Television na la khum tilouvin jong, Golden Choir lin Kipana Khopi kiti Visual Album ana semin, mipi ho lah a Pathen thupha lhang sapna ana neijin ahi. Hiti chun, tu changeijin, Golden Choir hin Vahchoina lasem minthang ho a kon leh, Pathen mite hon sum le paija akithopinao jallin, Kipana Khopi Visual Album chu Volume 7 gei ana thenso taovin ahi.
