Keithelmanbi khochen tillin acheng masaho kigamla tahtah a ana chen jeh-un imalam jousea ana kipunkhom thei pouvin, hijeh chun houlama kaikhomna jong ananei pouvin ahi. Mi ahungchen lut tamjep phat’in Pathen hou jong ahungpun betan kaikhomna dingkhat neilou akhohdan ahin gelpan tauvin ahi. Hitichun pute pate anacheng masaho adeh in ;
- NK. Paokhothang Kipgen
- Sergeant Kimkhosat Lhouvum
- Sehhang Lhouvum
- Paolim Hangsing
- Hav. Hemseh Kipgen
- Hav. Jangkhosei Kipgen
- Sehkhohel Hangsing
- Lamkhopao Hangsing
- Paolen Lhouvum
Amaho hin Pathen asempao geldoh jingthei nadin Date 7th November 1947 nilhah in School inna Pathen minnin kaikhomna masapen chu ananei taove. Hiche kaikhomna masapen nachun Pu Paokhothang Kipgen’in ana lamkaijin chule kaikhomna akipantai tin phondohne le thensona taona Pu Sehkhohel Hangsing ‘in ana mangin ahi.
Lungset umtah chu ahile hiche khosung houbung ana phutdoh-a achunga minchong pute pate hohi Pu Paokhothang Kipgen tilou adangsen vang hiche Golden Jubilee muthei louvin abanban’in phat chedungjuijin ahinkhou analemtai.
Hiche kaikhomna nilhah masapen kikhen chun lunggil tah in Pathen henga taona nei pummin lamkai ding kilhen’a ana neijun, Pu Thangleng Kipgen chu Pastor dingin chule Pu Hemseh Kipgen chu Secretary din ana lhengdoh taovin ahi. Hitichun chuche nilhah a patchun houkhomna maicham ahung chejom pantai.
Hitia phatchom khat School inna ahung kaikhom jou phat’un Houin’in khat neilou akhoh jeh-in sahlang lentol ninglang, tua water tank umna komma khun Houin khat 1948 kumbul tillin anasaovin ahi. Hiche Houin chu abang ngathal lin ana genun, leibang ana kiloijin chule achung BI ana kikhun ahi. Hiche houin kisahdoh chu 18th may, 1948 nin mipi kaikhomna theidin taona ana neijun kaikhomnan ana kimang pantai. Hiche petna Pastor chu Lamkhopao Kipgen anahin, Hemseh Kipgen, Khothang chule Pu Onngul Kipgen ama hohi aban chan Deacon, Secretary chule Houin lhacha anahiuve.
Phat ahungche toh kilhonin houbung jong ahung machal chehcheh in, houbung chu pilhing ahung hitai. Hichea kon chun houbung kiphudohna kin neidin phatsahna ahin neijun Pu Paokhothang le Pu Hemseh in Pu John Anderson, American Baptist Missionary (ABM) anakou lhonin, Keithelmanbi Baptist Church chu houbung pilhing ahitai tin Date 17th April, 1949 nin taona tothon Pathen henga thensona kin ana mangun ahi. Hiche nikho chun houbung mipin Pu John Anderson chu Saipikhup anasilpeh-un chule ankong jong thanom tah-in ana umkhom piuvin ahi. Hiche petna Pastor chu Pu Seipao Thangeo ahi.Chule hetding khat chu 1947 kum chun houbung kaikhomna ana kipan tajongle 1949 kum hi houbung kiphudohna kum chinna kihinla ahin chule Pu Seipao Thangneo chu pastor masapenna ana pang ahi.
Houbung mite Pathen phatthei bohna nasatah in anachangun, mihem jong ahung punbe be tauvin ahile, Houin chun ahindol tapouvin hijeh chun houin thah khat ahin gong pan kit tauvin ahi. Hiche a thanom tah a ana kilolnau chu ahile houin thah alen khat sahding, akhom jong Kheng khomcheh chule aletdan tuhthum kol cheh dingin ana kiphatsah un, houin chu lung kitoh tah-in ahin sapan’un ahi. Kumthum vel ahinsah jouvun 1956 kumhin houin thah chu ana kisa joutai. Hiche houin hi Supt. Pastor Thangkhopao vin thensona ana neijin ahi. Hiche Houin anasah laijun houbung mipiten lung kitoh tah-in tha le jung anatoh khommun, thing le song ana pukhommun longdellin na ana tongkhom’un ahi.
Hiche houin thah a kaikhomna le Pathen phatthei bohna jalla houbung khantou dungjuijin houbung mipiten houin Pucca building khat sahdoh din tohgon ana neikit tauvin ahi. Song ana lhohkhom pan kit tauvin chule phat chomkhat sungin foundation jong ahin jou paikit tauvin ahi. Ahinla phatche dungjuijn khosunga houbung jong ahung kikeh khen tan ahileh hiche houin thah kigong hi kum phabep sungin ana machal jou tapon ahi.
1970-1971 sung hin hiche houin building sahhi ana kipan kit’in natoh machal theina din Building Committee ana kisemdoh in, Chairman le Secretary mopohna noija natoh ana kipan kittai. Hiche houin pucca building sahdoh theina din houbung mipi ten tomngai tah in lam chom chom’a paisa ana hollun tha le jung anatoh khom mun ahi. Church Building fund din houbung mipiten Gun galla Saikul lampi tha tamtah lutin ana laijun, Kangpokpi Cattle Farm ma dangka tamtah ana lodoh un, Gun galla kolbu poh in sum analouvin, chule tha tamtah lut’in jou langa houin thing ding ana kaijun ahi. Chekeo hilouvin houbung mipi ten ama ama kipehna khutthem, thilthem khutsoh ho akitoh khomin, houin sahna din dangka akisosah in ahi, ain sonna kum phabep sungin akidongkhom’in chule khangthah tele Nuten jong amaho jokham cheh in Houin sahnan apangun ahi. Chule houbung danga konnin jong panpina ana kimun ahi.
Kum tamtah houbung mipiten lungkhat le thakhatna tha le jung kenga houin thah kisa chu houbung sunga ngailut umtah sopi ule nao tampin hinkho lemna ana neita jongleo 1989 kumin jothengin aumin, chule Date 30th November 1989 nin Pu Rev. Seikholet Singson ‘in hitihin thensona ana neitai.
“PA PATHEN HATCHUNGNUNG TONSOT PAKAI HENGAH HICHE HOUIN HI NIKHO 30-11-1989 (VANGHOMNI) NIN AKIPEDOH TAI” Aphongdoh Rev. Seikholet Singson.
Hiche nikhoa patnin hiche houin Pathen houkhomnan tuni geijin akimang jingtai. Hiche petna Pastor chu Pu Nehpao Lhouvum ahi.
1961 kummin houbunga chapanghon Pathen thudol le leiset chihna le hetna ahinnei theina dingun CHRISTIAN SCHOOL khat ahin phutdoh –un, Class A. a-pat Class VI chan ana ummin hiche school hi Chairman le Secretary mopohna noija Board of Deacon’in vetsuina ananeijun ahi. 1966 kummin hiche Christian School hi houbungin State Government khutna mopohna jouse pumin pehdohna ana kineitan ahi.
Pathen lenggam’a dinga houbung natoh lenpen Missionary Project 1990 kummin ana kiphutdoh in, Missionary Challenge masapen Evan. Laltingen Vaiphei makainan thanom tah in ana kimange. Hitichun Burma gamma Sollenmu le Evangelist khat Missionary in chule Micah Gurung Nepali holah a Missionary in ana kisolle. Hinla vangset umtah –in 1993 kummin Missionary project hi ana kisubei tai. TBA Missionary Project noija hiche natoh hi tuni chan geijin akitong jingnan hinla houbungin thanom tah a ana kitong doh project vang chu ahi tapon ahi.
1949 kumma khosunga houbung ana kiphudoh chun Kuki Baptist Association (KBA) noija kiloikhomna a ana pangun ahi. Kum phabep jouvin February 1959 sung hin Keithelmanbi khosunga Association Conference ana umin ahi, hiche conference ahin Kuki Baptist Convention (KBC) jop dingin phatsahna ana kinei tolhonin, houbung hi KBC noija ana umkit tai. Kum phabep KBC noija akium jouvin kivaipohna lam chom chomle min chom choma ahung um kittah jeh-in, hiche houbung jong KBA noija 1969 kummin ana umkittai. Kumni tobang KBA noija akium kit jouvin KBA chu September 28-October 1, 1971 sunga Haipi houbung munna General Assembly a chun ana seikhom mun September 30, 1971 nikho chun KBA houbung hoa kon thalhenga hung kikhom cheng chun lungkhat tah –in Kuki Baptist Association (KBA) chu Thadou Baptist Association (TBA) tin akhel taovin hitichun tuni channin hiche houbung hi TBA noija houbung kiloikhomnaho lah a houbung lenkhat’in ahung umtan ahi.
Hitichun 17th April 1999 kum chun Keithelmanbi Baptist Church TBA’n kum 50 lhinna GOLDEN JUBILEE chu loupitah in ana kimangin Golden Jubilee hetjingna dingin Jubilee Song ana kiphut’in Rev. V. Sitlhou Executive Secreatry TBAI in Pathen henga thensona ananei tan ahi. Chule hiche Golden Jubilee kiman jou chun Golden Jubilee hetjing nadingin Choir ahin kisemin hiche choir min chu Golden Choir tin akiminvo in tuni geijin Houbung sung hihen lang, Houbung pam hijongleh, Pathen Vahchoilasa in akimangcha jinguvin ahi.
Pathen phatthei boh najallin Houbung mi apun cheh cheh tah jeh-in Houbung miten lungkitoh tah-in houin thah sahding ti tohgon akineiyin hiche sahdoh-a aumtheina dingin Building Committee jong akisemdoh tan ahi. Chule hiche Houin thah sahna dinga chun Budget jong 12-15 Crores akigongin ahi. Ahithei le Houbung kiphudoh kum 75 (Platinum Jubilee) alhin masanga sahdoh dingin tohgon ahi.
